位置: 主页 > 设计热门 >【盘房来料】百威亚太捲土重来以息诱客 >
  • 【盘房来料】百威亚太捲土重来以息诱客

    2020-06-13
    【盘房来料】百威亚太捲土重来以息诱客放大图片

    隔晚美股回稳,市场静待今晚联储局议息结果,目前利率期货显示今次联储局议息或减息0.25厘,而大家更关注应该係议息会议声明,如果减息预期跟市场一致,当然对股市係正面;一旦议息声明变得鹰派,股市就有得震,冇得瞓。而港股今日半场可以话闷到呕,高位波幅只有134点,几乎係点咗穴咁款。

    恒指高开48点后,升幅一度扩阔至100点,见过26891点半日高位,可惜喺10日线(26889点)及50日线(26891点)滙聚区遇到阻力,结果又掉头回落,呆呆滞滞下恒指倒跌33点,低见26756点,其后收复失地。恒指中午报收26797点,升7点;国指同样升7点,报收10509点。

    蓝筹股个别发展,不过高盛发报告睇好5G共建共享,睇好联通(00762)及中电信(00728),更表示两间公司望在网络覆盖及深度方面,可以跟中移动(00941)有得挥。得到高盛加持,两股齐齐上升。至于其他重磅股有升有跌,其实个市闷到咁,真係不值一提。

    今日手机股又落镬,主要係苹果新iPhone内地预售成绩相当劲,电商京东开卖五分钟即沽清iPhone11 Pro系列,苹果新机预售量按年增加480%;而另一电商天猫首日预售量按年增长335%。内地人口里话爱国,要支持国货,但身体总是最诚实,把口几唔锺意外国势力都好,咪又係狂买外国货。苹概股落镬大炒,相关股份升幅闲闲地由3%至10%,反而之前係威係势嘅舜宇(02382)只係升得0.6%。

    话咗见到石油股升唔好太兴奋,喺沙地能源部长披露,石油设施遇袭后,最快可于本月底回复正常生产,消息拖累国际油价显着回落,而出咗名难炒嘅三桶油以及其他油服股亦齐齐脚软。相反受油价急升影响,早两日急跌嘅航空股,今日反弹。

    7月份重量级新股百威亚太(01876)捲土重来,再进行其集资计划,入场费减至3030.23元,今日开始招股,而集资额则缩水一半。不过百威亚太减价后亦唔见得特别平,不过由于上次招股时,喺国际配售部份未有引入基石投资者,可能汲取咗上次教训,今次已经搵咗GIC认购总值10亿美元新股。而招股文件今次更承落上市后派息比率不低于25%,一于以息诱投资者。

    不过较吸引阿Man注意嘅係另一只主板新股LFG投资(03938),家阵唔係建议大家要落飞,主要係LFG即係鱼缸中人称为LEGO嘅金融机构,今年第一季时曾受港交所(00388)绿色通道丑闻困扰。当时有传闻指LEGO係涉嫌被调查对象之一,其曾保荐嘅新股曾透过绿色通道获上市审批。

    不过LEGO成功上市,呢个谣言不攻自破,能获批上市证明公司并未涉及相关丑闻,而过往由LEGO保荐上市嘅公司亦属清白,并唔係传闻中嘅问题公司,所以阿Man经常强调Fact Check係一种态度。

    麦狄文
    (徐狄怡‧证监会持牌人)



    上一篇: 下一篇: